IN GEDENKEN AN ZWEI WUNDERBARE, LIEBE FREUNDE
Der Turnverein Aarwange truuret ume Simon und ume Niklaus Schwarz. Dür ne tragische Unfall i de Bärge, si sie abrupt us üsere Mitti grisse worde.
Sie hei üse Verein mitprägt und hingerlöh e riesigi Lücke, wo nie wird z’fülle si. Mir verlüre zwe langjährigi, härzensgueti und liebi Fründe.
Liebä Simu
Liebä Chloisu
Es macht mi sprachlos u d Truur sitzt toif. Vorauem drum, wiu mir mit euch so unzählig viu spassigi u schöni Momänte, viu Luschtigs in Verbindig bringe.
Mir vermisse euch, dihr fählet a so viune Egge u Ändine. Mir verlüre mit euch ned nume zwoi gueti Turnkamerade, sondern zwoi ussergwöhnlichi, härzensgueti, amüsanti, zuvorkommendi u loyali Fründe. Dihr beidi sit perfekti Allrounder gsi, turnerisch starch, im gsellschaftliche Zämesi unschlagbar, ä Gwünn für jedä Momänt, für jedä Wettkampf. Du, Simu, hesch di a de Turnfescht unger angerem ou em Nationalturne verschriebe gha u bisch erfolgrich mit Chränz hei cho. Ned zletscht hesch du letscht Jahr mit dire Goldmedallie im Einzelwettkampf DIR u üsem Verein aui Ehr gmacht.
Im Jahr 2010 bisch du, Simu zum Ehremitglied ernennt worde. Du bisch immer mit so viu Engagement aktiv gsi im Verein, hesch Jahrzänte vor Jugi bis zur Männerriege immer gleitet, bisch Kampfrichter gsi u ou im Korbball, Volleyball und Unihockey ä sichere Wärt gsi für jedi Mannschaft. Zig Skiweekends, Turnfahrte u angeri Aläss hesch du organisiert, scho elei dert drvo gits unzähligi Erinnerige, wo üs üses Läbe lang wärde begleite. Es führti zwiit, hiä afo Gschichte zverzeue, das wärde mir unger üs no lang, lang mache u euch vermisse. I dänke, sogar dis unverkennbare Schnarchle, Simu, wird üs fähle.
Du, Chloisu, bisch a so viune Aläss drbi gsi, üsem Verein immer treu bliebe, ou we du in Biel gwohnt hesch u dört ime angere Verein Aschluss gfunge hesch gha. Du bisch ä Teil vo üs gsi, e Fründ für aui Fäu, dr ruhigeri aber ned weniger humorvolli, härzlichi, hilfsbereiti Brüetsch u Turnkamerad. Du hesch wiä kei angere chönne motiviere, so dass mr über diä eigeti Gränze us gange isch u sgschafft het, übere eiget Schatte zspringe. Euchi Liebenswürdigkeit u euchi Art immer positiv zsi, isch üs es grosses Vorbiud. «Problem» gits ned, diä chame immer löse u Zyt für nes ärnsthafts Gstürm heit dihr euch scho gar ned gno. D ihr heit ä jedem sGfühl chönne gäh, jetzt grad zur richtige Ziit am richtige Ort zsi.
Euchi Liebi zu dä Bärge u dKenntnis drüber het üs ou prägt. Über 25 Jahr lang het immer mindeschtens öpper vo euch diä Herbschtreise mitorganisiert. Du Klausi vilicht chli vorbereiteter aus dr Simu, du bisch de aube ou go rekognosziere, während dr Simu sich öppe diä elei uf dKarte u dr Instinkt verloh het. I ha mr lo säge, dass es öppe mau sone guete Motivator wiä di, Chloisu, brucht het, we dWanderig statt de vom Simu versprochene 20min haut de glich nomau 2 Stung duret het…
Egau wo mir aus Verein häre si, dört het me Di, Simu, entweder scho kennt oder emu de kenneglehrt. Du bisch uf aui offe u härzlich zue, das het di usgmacht, hesch ou neui Turnvereinmitglieder immer härzlich willkomme gheisse u di interessiert drfür, wär sie si u vo wo u was u so… Du bisch, ob hesch wöue oder ned, üses Merkmal gsi, üses Ushängeschild, mängisch ou, ob mir hei wöue oder ned.
„Es isch truurig, we diä Mönsche, wo üs diä schönste Erinnerige gschänkt hei, säuber zu Erinnerige wärde.“ Das Zitat hani im Internet gfunde u es het mi diä letschte Täg begleitet.
I cha mir hüt noni vorsteue, wiä diä nächsti Turnvorstellig ohni Euch söu stattfinde. E Garant für Unerwartets isch jewils dini Nummere gsi, Simu. D Art u Wis wiä du dini Ideene umgsetzt hesch isch würklich einzigartig gsi. I ma mi no so guet a dini Cowboynummere erinnere, Simu, ou dra, wiviu Närve mi das denn koschtet het gha im Vorfäud. Aber du bisch äbe wiu du bisch, me cha dir ned bös si u ganz ehrlich, i mues jetzt no drbi schmunzle u es isch diä einzigi Nummere, wo mir vo denn no isch in Erinnerig bliebe.
Dihr heit üses Läbe so sehr bericheret. Erinnerige si ou ä Form vo Begägnig, mir wärde jetzt ohni euch witergah. Wiä gärn hätte mir no witeri Erläbnis mit euch zäme i üsne Härze ufbewahrt. Mir säge MERCI für jedä Momänt mit euch. MERCI für jedäs Wort, jedi Umarmig, jedes Winke, MERCI für so vieles, wo mir im Härze wärde bewahre.
Liebi Truurfamilie, mir si i Gedanke fescht bi euch. Mir wünsche euch, dass ä toifi Dankbarkeit diä Truur cha ablöse. U für euch, Muriel u Livia, wette mir aus Turnerfamilie ou immer es Stück Heimat si, we dihr das möchtet.
Chantal Lanz
Mir wärde öich nie vergässe!
Turnverein Aarwangen